Marcus Rashford បានកំណត់សម្រាប់ការពិភាក្សាជាមួយប្រធាន Man Utd ថ្មីលោក Jim Ratcliffe ដើម្បីឈានទៅស្វែងយល់នៃការធ្លាក់ដល់បាតជាមួយនឹងរដូវកាលដ៏លំបាករបស់គាត់។ ទម្រង់លេងរបស់ខ្សែប្រយុទ្ធរូបនេះបានធ្លាក់ចុះយ៉ាងខ្លាំងនៅរដូវកាលនេះ ។
Manchester United ពិតជាមានបំណងចង់លក់ខ្សែប្រយុទ្ធជម្រើសជាតិអង់គ្លេសរូបនេះ ៨០លានផោន បើសិនជាមានសំណើរណាមួយកើតឡើងនោះ។ Rashford ចង់នៅបន្ដ ហើយមេ Man United ថ្មីលោក Ratcliffe ក៏មិនបានបោះបង់គាត់ដែរ រឿងដំបូងដែលគាត់ចង់រកឱ្យឃើញពីមូលហេតុដែលតារារូបនេះបានធ្លាក់ទម្រង់លេងបែបនេះ ហើយគាត់ក៏ចង់ដោះស្រាយបញ្ហាជាមួយគ្រូបង្វឹក Erik ten Hag ផងដែរ។ លោក Sir Dave Brailsford ដែលជាដៃស្តាំរបស់ Ratcliffe ទំនងជាដឹកនាំកិច្ចប្រជុំជាមួយកីឡាករវ័យ ២៦ឆ្នាំ និងអ្នកតំណាងរបស់គាត់ឆាប់ៗខាងមុខនេះ។
Rashford បានបង្ហោះតួរលេខល្អបំផុតក្នុងអាជីពក្នុងការរកបាន ៣០គ្រាប់សម្រាប់ Man Utd កាលពីរដូវកាលមុន ប៉ុន្តែរដូវកាលនេះរូបគេរកបានត្រឹមតែ ៨គ្រាប់ប៉ុណ្ណោះ។ ទំនាក់ទំនងរបស់ Rashford ជាមួយ Ten Hag បានធ្លាក់ចុះចាប់តាំងពីកីឡាកររូបនេះធ្វើពិធីជប់លៀងខួបកំណើតមកម្ល៉េះ។ គាត់បានធ្វើពិធីខួបកំណើតរបស់គាត់នៅក្លឹបរាត្រីបន្ទាប់ពីចាញ់ ៣-០ ក្នុងការប្រកួត Manchester Derby ក្រោមស្នាដៃក្រុម Man City កាលពីខែតុលា។ Ten Hag បានហៅ Rashford ទៅការិយាល័យរបស់គាត់ ដើម្បីនិយាយពីភាពមិនពេញចិត្តរបស់គាត់ចំពោះរឿងនោះ។ ប៉ុន្តែ Rashford បានជប់លៀងម្ដងទៀត លើកនេះនៅទីក្រុង Belfast រហូតដល់ព្រលឹមថ្ងៃសុក្រ ទី២៦ ខែមករា ជាពេលដែលគាត់ត្រូវបានគេហ្វឹកហាត់។ Rashford ត្រូវបានដកចេញចេញពីក្រុមក្នុងការប្រកួត FA Cup កាលពីថ្ងៃអាទិត្យពេលនោះជាមួយក្រុម Newport បន្ទាប់ពី Ten Hag បានដឹងពីការពិតពីការអវត្តមានហ្វឹកហាត់របស់គាត់។
ចាប់តាំងពីពេលនោះមក Rashford និង Ten hag ស្ទើរតែមិននិយាយអ្វីទាំងអស់ក្រៅពីការណែនាំក្នុងថ្ងៃប្រកួត។ យ៉ាងណាមិញ Rashford មិនចង់ចាកចេញទេ បើទោះបីជារូបគេបានដឹងទៅហើយថាក្លឹបប៉ុនប៉ងលក់គាត់ក៏ដោយ។ ៨០លានផោនបើសិនជាលក់ Rashford នឹងមានផលចំណេញដល់ក្លឹបក្រោមច្បាប់ហិរញ្ញវត្ថុ ក្នុងការស្វែងរកអ្នកថ្មីមកជំនួស។ គួររំលឹកផងដែរថាប្រាក់ខែខ្សែប្រយុទ្ធរូបនេះរកបាន ៣២៥០០០ផោន ក្នុងមួយសប្តាហ៍ រហូតដល់ឆ្នាំ ២០២៨ វាត្រូវបានបាត់បង់ប្រសិនបើគាត់ត្រូវបានបង្ខំឱ្យចេញ។
