Bayer Leverkusen គ្មានឡើយពាក្យថា ចាញ់ សម្រាប់ពួកគេនៅរយៈពេលជិតមួយឆ្នាំមកនេះ។ រាប់គ្រប់ក្របខ័ណ្ឌទាំងអស់ ក្លឹបដឹកនាំដោយអ្នកចាត់ការលោក Xabi Alonso បានឆ្លងកាត់ ៤៦ ប្រកួតហើយ មិនស្គាល់បរាជ័យសូម្បីមួយ ជាហេតុនាំឲ្យឱកាសកាន់ពាន ៣ នារដូវកាលទោលក៏មានខ្ពស់ ជាក់ស្តែងគិតត្រឹមសព្វថ្ងៃកំពុងកាន់ពាន Bundesliga ហើយរង់ចាំអ៊ុតមើល DFB-Pokal និង UEFA Europa League ពីរផ្សេងទៀត។
ចាប់អារម្មណ៍ក្នុងចំណោមនោះ មាន ១០ ប្រកួតដែលក្លឹបម្ចាស់ដី BayArena បានបង្កើតភាពភ្ញាក់ផ្អើល រំភើបញាប់ញ័រចុងម៉ោងដល់អ្នកគាំទ្រទូទាំងសកលលោក ដែលជាការស្រង់ខ្លួនឯង ចេញផុតពីការចាញ់ និងស្មើ នៅពេលវេលាកៀកនឹងចប់ការប្រកួតម្តងៗទៅហើយ។
មកទល់ពេលនេះ ជាប្រកួតទី ៤៦ សម្រាប់ Leverkusen ដែលលេងមិនស្គាល់ចាញ់ជាប់ៗគ្នាយូរបង្អស់ រាប់ជាក្លឹបលំដាប់ទីពីរ ឈរកំណត់ត្រាខាងលើ បើយើងគិតចាប់តាំងការបង្កើតក្របខ័ណ្ឌ UEFA នៅរដូវកាល ១៩៥៥/៥៦។ ក្លឹបឈោងបានតួលេខខ្ពស់បំផុតគឺ Benfica ៤៨ ប្រកួតនៅរដូវកាល ១៩៦៣ ដល់ ៦៥។ សម្រាប់ Leverkusen ពួកគេអាចបំបែក និងក្លាយជាក្លឹបទីមួយឈានដល់ប្រកួតទី ៤៩ បាន ប្រសិនអាចឆ្លងផុត AS Roma ទាំងពីរជើងនៅវគ្គ ៤ ក្រុម UEL និងមួយប្រកួតចន្លោះនោះថ្ងៃទី ០៥ ឧសភា ទល់ម្ចាស់ដី Frankfurt៕
